UVUSI Kunene olingisa indawo kaJack emdlalweni I-Generations: The Legacy ukhuza ibuya kulo mdlalo njengoba esanda kulaxaza umdlalo i-House of Zwide ISITHOMBE: SIGCINIWE
USALOKHU uqhubekile nokubuyisa izinkakha zawo umdlalo i-Generations: The Legacy okhonjiswa kwiSABC1.
Ngenyanga edlule kulo mdlalo kubuye umlingisi uRapulana Seiphemo olingisa indawo kaTau Mogale.
Kuleli sonto baveze izindaba zokuthi kubuya umlingisi osanda kushiya emdlalweni i-House of Zwide, uVusi Kunene ozoqhubeka nokulingisa indawo kaJack Mabaso.
Kulo mdlalo uVusi uzoqala ukubonakala ngo-Agasti 14, ngo-8 ebusuku.
Ekhuluma ngamafuphi ngokubuya kwakhe, uthe labo ababengamthandi bazoqhubeka kuleso simo ababekuso.
“Imizwa yabantu ngalo mlingisi ihlukene. Labo ababemazi futhi bengamthandi bazoqhubeka lapho. Kodwa iyodwa into ngoJack ukuthi inzondo abantu abamkhombisa yona uyayithanda. Kungijabulisile ukubuya kulo mdlalo nozakwethu engihlangane nabo nabo bangamukele ngezandla zombili, ngizizwa ngisekhaya futhi,” kusho uVusi.
Uthe uJack uzobuya namaqhinga akhe akudala nazoqhubeka nokujabulisa ababukeli futhi umdlalo uzoshisa kakhulu njengoba uzoba yilokhu ababukeli akade bekufuna nabakuthandayo.
Uphrojusa walo mdlalo, uMfundi Vundla, uthe uVusi Kunene ngomunye wabalingisi abahamba phambili, ngakho uzoqhubeka nokumisa umdlalo ezingeni eliphezulu elikuwo kusuka kudala kuze kube manje.
“Umbuzo abantu ababelokhu benawo selokhu ahamba ukuthi wafa noma uyaphila. Kuyangijabulisa mina nabanye, ngiyazi bazojabula ukuzwa ukuthi uyaphila futhi uzobuya ngegiya eliphezulu kulo mdlalo nemigilingwane yakhe. IndleIa azobonakala ngayo esiqephini sokuqala uzoshiya abaningi bebambe ongezansi futhi uzogcina ababukeli balo mdlalo bethe njo kuwo befuna ukubona isigcino,” kusho uMfundi.