UPENNY Lebyane ozokwethula uhlelo iThe Big Secret kwi-SABC1 kusuka ngesonto elizayo Isithombe: X
LUTHOLE ikhaya elisha uhlelo lapho usaziwayo elalela izinkinga nezimfihlo zabantu bakuleli abazobonakala bezitshela imindeni yabo kwisizini yesithathu yohlelo, i-The Big Secret.
Lolu hlelo obelukhonjiswa kwi-BET (DStv 129), luzoqala ukukhonjiswa kwi-SABC1 njalo ngoLwesibili ngo-6 ntambama kusuka ngoJanuwari 14.
Lolu hlelo seluke lwethulwa osaziwayo okukhona kubo uKhanyi Mbau kwisizini yokuqala, kweyesibili lwethulwa nguMasechaba Ndlovu.
Kule sizini i-SABC idalule ukuthi kukhona okusha okuzogqama ohlelweni ngoba kukhona ababoshiwe abazofuna usizo lokutshela imindeni yabo izimfihlo.
UPenny azobe ekwenza nakakhulu ohlelweni ukuxhasa osuke ecele usizo, uma eseya emndenini wakhe.
Ekhuluma ngokuba yingxenye yohlelo uPenny uthe kube ukufezeka kwephupho lakhe ngoba kade efisa ukusebenza kulesi siteshi.
“Ngiyaziwa ukuthi ngizithandela kanjani izindaba zakuleli ezithinta imiphakathi futhi eziyiqiniso. Ngakho izingxoxo esizoba nazo ohlelweni zizokwakha ubudlelwane, ziqinise imiphakathi esiphila kuyona, ukuze sibe nesizwe esiphilayo, esibumbene nesizwanayo.
“Ukuba ingxenye yalesi siteshi nenkampani eqopha uhlelo kube yinto enkulu kimina engingeke ngiyikhohlwe futhi ngizizwa ngithobekile kakhulu,” kusho uPenny.
Uthe akubheke kakhulu ukuthi bonke abazobe behamba nabo bathole ukuthula ezinhliziyweni futhi kuvaleke zonke izilonda abanazo nemibuzo abebedinga izimpendulo zayo.